Bakit Mahilig Uminom ang mga Kabataan?

Ang isa sa mga hilig ng mga kabataan ngayon ay ang pag-inom ng alak. Nagiging bisyo ito para sa karamihan. Hindi lamang ang mga matatanda ang umiinom ngayon. Maging ang mga menor de edad at kahit ang mga kababaihan. Iba't iba ang kanilang dahilan kung bakit sila umiinom ng alak. Dahil sa okasyon at kapag sila ay may problema. At ito ay nagiging bisyo na nila. Kaya't nagiging pangkaraniwan na para sa mga kabataan ang uminom ng alak. Malalim ang mga dahilan kung bakit maraming nahihilig na uminom nito. Marami ring nagiging epekto ng pag-inom nito. At napakaraming naaapektuhan. Isa itong lason na sumisira sa buhay ng maraming kabataan.

Maraming bagay ang gustong subukan ng mga kabataan ngayon. Dahil parte ng kanilang pagkatao ang pagiging mapusok o mahilig sumubok ng mga bagong bagay. At dahil sila ay hindi pa gaanong mulat sa mga makamundong bagay, hindi nila alam kung pano hawakan ang ganitong bagay. Madalas ito sa mga estudyante sa kolehiyo. May mga umiinom ng limang beses sa loob ng ilang oras na tinatawag na binge drinking ngunit may iba rin na halos tatlumpung beses na uminom sa loob lamang ng isang araw na tinatawag na heavy use drinking. Ito ay karaniwan sa mga kabataan mula labingwalo hanggang dalawampu't limang taong gulang. Isa pang bagay ay nagagaya ang mga kabataan sa pag-inom ng alak dahil sa kanilang mga magulang. Tuwing nakikita nila ito na umiinom. At bukod pa rito ay nagkalat ang mga alak sa mga supermarkets at grocery stores. Maraming menor de edad ang nakakabili dahil hindi na sila hinihingan ng ID tuwing sila ay bibili. Maliban na lamang kung ang bibilin na alak ay talagang hard drink. Pero kung sa mga sari-sari store, kahit ang mga batang puslit ay makakabili ng alak. Isa pa sa mga dahilan ay mahina ang emotional support ng mga magulang sa kanilang mga anak. Kaya't nababaling ang kanilang atensyon sa alak. Kasama na rin ang peer pressure. Kung ang mga kabarkada ng isang kabataan ay mahilig uminom ng alak, siguradong mahahawa siya sa kanila at magiging tomador na rin. May parte rin ang media. Ang alak ay palaging inuugnay sa mga babaeng nakasuot ng bikini, lalakeng malalaki ang katawan at mga masasayang oras. Nadadala sila sa mga babaeng nakasuot ng bikini na nagmomodelo ng alak dahil karamihan sa mga umiinom ay mga lalaki. Kaya't sila ay nahuhumaling sa katawan ng isang magandang babae. At iniisip nila na kung bibili sila ng alak na iyon ay makakakuha sila ng babae na nakikita nila. Akala rin nila na magmumukha silang lalakeng lalake kung sila ay iinom ng ganoong alak. Para mukha silang kaaya-aya sa mga babae. Akala rin nila na magiging masaya sila pag sila ay uminom ng alak dahil pinapakita ng media na lahat ng mga taong umiinom ng alak ay masasaya. Nagiging ugali na rin ito ng mga kabataan na akala nila ay magiging masaya sila kung sila ay iinom. Iyan ang karaniwan na dahilan kung bakit napakaraming lasinggerong kabataan ngayon.

At ang bawat isang dahilan ay may napakaraming epekto. Maliit man o malaki. Kaunti man o madami ang naaapektuhan. Nakakagawa sila ng mga bagay na bawal nang hindi nila namamalayan. May mga nakakabuntis dahil minsan ay may mga okasyon na may mga kasamang babae na umiinom ng alak.

Mayroon rin na nakakapatay dahil hindi na nila makontrol ang kanilang sarili. Nadadala sila ng kalasingan kaya hindi nila alam ang kanilang ginagawa. Nangyayari rin ang mga sex scandal dahil dito. Sa sobrang pagkalasing ay hindi nila alam na sila ay ginagawan na ng isang iskandalo.

Kaya't maraming buhay ang nasisira nang dahil sa alak. Higit sa lahat, masama ito sa kalusugan. Iba't ibang sakit ang nakukuha mula sa pag-inom ng alak. Katulad ng allergy, kidney cancer, liver cancer at marami pang iba. Nasisira ang ating katawan dahil sa alchohol. Maraming sakit ang galing sa pag-inom ng alak. At sobrang nakakalaki ng tiyan ito. Tinatawag na beer belly. Madalas na umiinom ng alak ang mga kabataan dahil sila ay may problema at gusto nilang makalimutan ito kahit pansamantala lamang. Iniisip nila na sa pamamagitan ng alak ay matatakasan nila ang kanilang mga pasanin sa buhay. Ngunit dindi nila alam na imbis na mabawasan ang kanilang problema ay madadagdagan pa ito. Kaya't nagiging bisyo nila ang pag-inom. Yung tipong hindi lumalagpas ang isang araw nang hindi sila tumutungga ng bote ng alak. Marami pang dahilan at epekto ang pag-inom ng alak. Ito ay mga karaniwan lamang. Mga kadalasang nangyayari kapag may mga nalalasing.

Ang pag-inom ay maaaring iwasan. Kailangan lamang ng disiplina at sapat na kaalaman tungkol sa pag-iinom. Hindi pa huli ang lahat para tigilan ang pag-iinom. Kayang mabuhay ng walang alak. Oo nga. Maganda ito sa puso ngunit tandaan na ang lahat ng sobra ay masama. Maaaring uminom pero dapat ay magdahan-dahan upang mapangalagaan ang ating kalusugan. Mahirap nang magsisi sa huli kapag dumating ang araw na magbabayad tayo ng malaki dahil sa ating pag-inom ng alak. Dapat ay gumawa ng aksiyon ang gobyerno tungkol sa pagbebenta ng mga alak. Dapat ay magkaroon ng mga age limit sa mga bumibili ng alak. Humingi ng ID kung kailangan. Para masiguro ang seguridad ng mga iinom ng alak. Dahil karamihan sa mga pinagmulan ng krimen ay ang kalasingan. Kaya't dapat na pigilan ang sanhi upang hindi mangyari ang bunga. Isa lamang ito sa mga problema na dapat lutasin ng mga pilipino. Para magsimula na ang pagasenso at hindi nakatengga lamang at walang ginagawa kundi uminom ng alak. Kung magsisipag lamang at titigilan ang pag-inom ng alak ay siguradong gaganda ang mundo. Mababawasan ang mga lasing at mga adik. Magiging mas ligtas ang kapaligiran. Kaya't dapat na simulan ang pagbabago para mapaganda ang ating mundo. Walang imposible kung ating gugustuhin. Ayon nga naman sa kasabihan, "Kung gusto maraming paraan. Kung ayaw maraming dahilan."

Ipinasa kay: Prof. Beverly Siy

Ipinasa nila:

Peter Albert V. Santos

Shun Toyokawa

Jerom Deang

Axcel Ramos